Pgaz K'Nyau dauv quv พิมพ์ ส่งเมล

ImageLix t'beif iz baf taj kwaiv htauf auz of dauv taj p'nyof hki miz. Le av tohkof t'miz div k'duv seif nya pgaz lehko t'hkau, lauz hsau daf taj pgaz pe hti pe kauj seif t'hpaf k'seif nya naj pej wai daf le Pgaz K'Nyau hpaiv auf hsgif hpaiv auf quv neif, t'meij taj maz hav gauz seif dof taj pgaj, t'meij maz nax cif nax coz wai div le av waiseif naj pej wai le av pooz kwix av sauv neif baf. Baf hsaf maz wai baf gix baf geij dauv lepgaiz wai daf dauv taj k'tauz hti k'tauz kauj neif lauz. Hki miz t'miz div sauv p'wai daf Pgaz K'Nyau hpo seif t'hpaf k'maz lo seif nya keiz p'moj p'paj p'hpi p'hpu seif leplez av taj seif nya baf qav dauv taj maz muj auf waiz, lauz hsau daf taj taj hpaiv auf hsgif hpaiv auf quv iz av gix av geij. P'mei hpav lix t'beif iz tuz le av k'tej neif p'k'seif nya le p'moj p'paj seif av taj hpaiv auf quv iz lepgaiz wai daf dauv taj seif nya naj pej le baf k'taix k'tauz keiz seif dof waf pgaj le av meij Ywaz av taj baf tei iz div laif div lauf neif lauz.

                                                   



                                                        Nif sauhkof
 
            P’wai daf Pgaz K’Nyau neif, mei maz taj le av lof dof tau dof t’miz geiz t’miz geiz aif dauv htif la av maix laux cez. P’civ le taj dof muj dof la.  La neif k’pauz lauz neij pgaz le muj naz hkau,  meimeij muj neif k’pauz lauz neij pgaz le muj hsa hkau. P’taj of moo dauv p’gix p’geij looz t’nif klez of caiv boov dauv la.  Maz sav div neif av qo p’baf htuj baf nax auz geiz geiz. Taj le la neif t’meij av kux htauf daf wai baf, haipej le htoo teilauz Ywaz teilauz. Maz sav div neif av qo, seij seij le k’maz auf maz au taj k’baf htif la av maix laux cez.  Mei t’meij div neif baf neif, taj maz taj auf lauz tij lauz hsaiv t’sei baf. Mei htif htauf la av maix blau neif, p’tai lauz hsoo lauz hsaiv le k’maz auf maz au m’taz laif m’taz lauf sei.  Taj iz meij wai p’wai Pgaz K’nyau hpo av kwauj dauv av taj hpiv taj maz.
            P’taj of moo le t’nif av tauj pooz k’cav htauf wai daf le la “Htihpaiv”. P’tai dauv kwaj t’ha nya iz T’lei si. Pgaz tai la si neif av si kwiv, t’hpla nau caiv lez baf, t’htif nau caiv lez baf, lauz maj bgauf. P’kauv auz le “la hkiv ha”. T’lei si t’niz nya iz le gauz t’niz Htihpaiv htauf. Htauf le av tohkof t’niz neif hsiv kaingai lauz, p’t’htif div baf. Taj le av htif wai meij wai “hswif”. Hswif neif av maix htif, kwaj htauf taj soo moohkof, htif la hso le taj gux taj gaz av maix nya dauv mau taj gof gof gof. Htauf hki niz t’niz p’t’htif div ceij ceij. Taj le av htif htauf dauv wai meij wai htauv, p’naj dauv klauj. Mei meij hswif k’htif wai hpla dof neij pgaz sauv t’caiv dauv. Maz k’dauv le muj hseif htauf dauv t’niz neif Htihpaiv htauf wai daf se niz t’niz. T’niz nya iz le ha lauz hkau t’paz, taj k’pauz krej lax div, baf hsaf muj av maix t’hpla lez baf. P’mei kwaj taj soo muj nux t’roox de k’cej le seif cauv hki, p’k’htif la hplahtauf wai hsiv kaingai, nei cuhsaf, tauv teiv deiv, k’pauz li lax, av hkof coov m’yoov av hki coov m’yoov, keif klauz hkai.
          Taj t’ha nya iz p’miz p’pgaj le av seif nya wai, maz lauz teiz auf lauz teiz wai k’tai baf av hpo av liz le:
          “Hpo seif liz seif eh, laiz kwaj la av maix, laiz hklei hklei, haikaux av k’lauz nux. Tuz iz soonya paz neif, p’k’baf cav htauf maz auf maz au taj dauv.”
          T’blau neif, p’k’lauz hkof lax dei dauv laiz kwaj dauv la av maix praij lauz. Tuz meij htif Htihpaiv av maix li neif, p’k’tai laux sav le :
          “Av iz neif, legauz t’niz Htihpaiv k’htauf lwij sau t’sau. P’k’baf maz neij bubeif husav, loz htauf bu loz htauf hu, yauj bu hsu bu, hpau siv hpau meiz, maz auf meiz toj pix meiz hklau bof le p’k’kij cu tez hkauf hsaiv lauz Nif sau hkof av gauj.”
Muj hseif htauf p’k’cav laux sav le:
“Muj hsa niz nya iz guz bu sei li ah?”
P’k’tai hse laux p’sav le:
“Guz sei li.” (Pgaz hpau siv Nif sauhkof p’kauv auz le “guz bu”.)
           P’mei tai laux sav le guz bu sei li neif, p’hif hkof baf guz bu hso le av hpo av liz av maix nya. Hif hkof av hpo av ma k’loz htauf bu, muj qeij lauz yauj wai daf, yauj bu wiz muj lauz baf hpau htauf wai.  Le muj hseif htauf dauv t’niz av hpo av liz guz htauf keiz bu le av lauj prauv, kauv dev swav hpav.  Loz htauf bu, yauj wai dauv hpau htauf wai. P’hpau siv hpau meiz neif p’maz div iz : P’hpau meiz miz p’k’hkwaiv lauz auz le meiz laf pooz, qax tij qux auz dauv kof mif, kev lauz le s’pez pooz, t’tef htauf av hti div baf dauv kav be av hkof.  P’kauv le “bauv meiz”.  P’pax auz se sau, tef htauf keiz av hti. P’kauv le “tef htauf taj”.  Tef  htauf  av hti wiz pax k’dauv 2 sau do htauf. 
           Tuz meij siv baf dohtauf blau neif, p’hif hkof baf do htauf hso le av hpo av liz av maix nya dauv ceij.  Hif hkof mei do htauf wai le gauz hkau, muj ha lauz av hpo av liz do htauf keiz wai. Baf hsaf mei do htauf wai le muj ha lauz, av hpo av liz baf do htauf keiz le muj hseif htauf dauv t’niz.  Av hkau p’nyau le baf pax av bef cez t’niz meij geiz t’naz meij geiz.
Do htauf siv mei wiz kauv dev blau neif, hpai laif dev laif av htauv av hsau t’of pax baf, p’k’baf laiz qu neij. Hpai taj hse k’tauj iz paux muf pgaj hposaf ho seif t’hpaf k’yauj auf piv iv le k’toj auf meiz toj pix av gauj, k’laiz daiv neij qaiv laf le k’tauz auf meiz tauz av gauj.  P’k’tauz taj iz auf taj hse k’tauj t’maux hki niz se niz. T’blau neif p’k’cav laux sav le:
“K’tauz taj qez taj qauj koov kauv gaz li ah? Le gauz t’niz kij lauz cu sei li ah?”
Hpo liz k’tai hse le:
“Eh! kij cu sei.”   
           Av neif blau neif, le muj hseif htauf dauv t’niz muj lauz baf p’k’hehtauf piv iv toj auf meiz toj pix, qei neij qaiv laf tauz meiz tauz dauv hklau miz auz.  Meiz toj pix toj mei wiz li, p’k’wix neij auz baf t’tauz duf 3 lof dauv p’pax caif keiz auz, p’kauv auz le “meiz toj pix hkof”. Le av of div kla p’k’auf s’kauv prauv de hpo de liz de moj de paj de puj de waij.  Meiz tauz hklau mei miz li p’k’hiv neij auz 3 k’dauf dauv pax caif keiz auz, p’kauv auz le “meiz tauz hkof”. Le av of div kla m’taz taj mof auf sav laif p’auf sei.
           Le muj ha lauz t’dev dauv t’dev p’wai le av kai taj av paj t’gaz neif p’k’baf laiz paux neij keiz p’hpo p’ma dauv p’k’caj av k’laz. P’k’hiv htauf neij taj pof lof t’hplef, teij lauz nif t’koox, hsei t’beif, s’kwi hki hplef se hplef, k’hti hki koox se koox, siv t’ko, meiz toj pix hkof t’lof t’caiv t’lof t’caiv, meiz tauz hkof t’k’dauf t’hplef t’k’dauf t’hplef.  P’k’hiv htauf taj pof lof hplef iz, hsau kij cu hki beif, nauf paux krav t’bo dauv p’k’laiz qauz soo gauz k’tauj. P’k’baf kwaj le av baf klai 3 bo hsaiv roj laux av sav, quv klai meij geiz, hti def au klai meij geiz, pgaz hif av klai meij geiz.  Laiz tuz p’k’paux krav neij keiz p’hpo p’ma av k’laz, p’k’htu k’hpaf taj div iz:
“Pru! hpomuf k’laz hai keiz, pru hpohkwa k’laz hai keiz. Muj hsa t’niz iz baf muj geiz baf la twaif, muj baf hse keiz av lauj le Nif sau hkof k’dauv li. P’k’kij lauz p’cu p’k’tez lauz p’hkauf. Tuz iz soonya p’k’baf hpaiv hsgif p’k’baf hpaiv quv, p’k’baf koox seif p’k’baf koox waf, p’k’baf hsoov meif p’k’baf hsoov hpaf, meif oo k’laiv hpaf hsa k’oo. Hpo muf hpohkwa eh, av iz neif hai keiz of hpgof hai keiz of tiz, hai keiz of qoo hai keiz of hpauv, hai keiz of le hif hai keiz of le qau, hai keiz of le dev hkof hai keiz of le lauj pooz, hai keiz of de moj hai keiz of de paj, hai keiz of de puj hai keiz of de waij, hai keiz of hkuf hai keiz of bav.
Hav of le miz hkof t’geiz hav of le pgaj pooz t’geiz, hav of le miz kla t’geiz hav of le pgaj kla t’geiz, hav of le seif hkauf hkof t’geiz hav of le waf hkauf htiv t’geiz, hav of taj gej av sauv t’geiz hav of taj hklif av sauv t’geiz, hav of le kwi hkof t’geiz hav of le kwi pooz t’geiz, hav of de deif av sauv t’geiz hav of de nyaf av sauv t’geiz, hav of de htauv tij av sauv t’geiz hav of de taz soo av sauv t’geiz, hav of de bauf sof av sauv t’geiz hav of de taz k’waiz av sauv t’geiz, hav of le k’liz kla t’geiz hav of le sauf gauz kla t’geiz, hav of le taj hpgauf av kla t’geiz hav of le taj yax av kla t’geiz, hav of le taj noo av kla t’geiz hav of le taj nav av kla t’geiz, hav of de taz muf av sauv t’geiz hav of de taz qaf av sauv t’geiz, hav of de taj yoox av sauv t’geiz hav of de taj plaiz av sauv t’geiz, hav of de nauj lauz av sauv t’geiz hav of de nauj plauj av sauv t’geiz, hav of de taj miz mauf av sauv t’geiz hav of de taj plauj sau av sauv t’geiz, hav of de taj uv av sauv t’geiz hav of de taj qauv av sauv t’geiz, hav of de taj loz qe av sauv t’geiz hav of de taj yauj qe av sauv t’geiz, hav of de taj hsoov av sauv t’geiz hav of de taj hsa av sauv t’geiz. 
             Tuz iz soonya paz pgaz k’hpaiv hsgif pgaz k’hpaiv quv, pgaz k’koox seif pgaz k’koox waf, seif k’kaj baf naz waf k’tauj baf naz, pgaz k’hsoov hsgif pgaz k’hsoov quv, pgaz k’hsoov meif pgaz k’hsoov hpaf, meif oo k’laiv baf naz hpaf hsa k’oo baf naz.
Keiz … keiz auf meiz le av wif keiz au hti le av hsgi, keiz auf htof nyaf le av wif keiz auf hsau nyaf le av so, keiz auf meiz toj pix le av toj keiz auf meiz tauz le av hklau, keiz auf s’kwi le av wif keiz auf k’hti le av hse, keiz auf wif keiz au hse. Muj hsa t’niz iz kij keiz naz kauv keiz naz, keiz div av lex keiz div av hsei t’keij! Pru hpomuf k’laz hai keiz, pru hpohkwa k’laz hai keiz.”
Htuk’hpaf taj k’tej p’k’cav p’hpo p’liz le av hai dauv pgaz t’gaz hki gaz neif le:
“K’laz keiz li ah?”.
P’hpo p’liz k’tai hse pgaz le:
“Keiz li.” 
P’k’cav se blau div lauj lauj dauv p’hpo p’liz k’civ hse pgaz se blau div lauj lauj ceij kauv. Wiz dauv p’k’laiz paux krav k’dauv klai le av gaz t’bo div av hsaiv htauf se bo lex dauv p’k’qax keiz sav keiz soo dev. Keiz tuz le dev blau, taj pof lof t’hplef neif dauv hsau hki beif neif p’k’pax keiz auz laux cez.
              Le muj hseif htauf meij wai muj niz le baf kij cu Nif sau hkof. Le p’kai hif hkof t’gaz neif, t’maux hpai taj k’pauz seij soo htauf, p’k’hiv htauf neij keiz p’taj pof lof dauv hsau kij cu hki beif le p’pax keiz auz le m’ha lauz hkau, hiv htauf nauf dokwax t’beif, laiz qauz soo toz hkof dauv pax lauz taj pof lof dauv hsau le qau tej hkof, p’hpo p’ma p’hpo p’liz k’of pgaiz p’gauz htiv. P’k’hiv htauf nauf dokwax, t’klaux qau tej hkof kauv keiz hpo ma av k’laz dauv p’htu k’hpaf taj div av lauj lauj le m’ha lauz hkau. Htuk’hpaf taj kweij kweij t’klaux qau tej hkof le nauf dokwax kweij kweij tuz meij p’taj htuk’hpaf k’tej. Htu k’hpaf taj k’tej p’k’cav p’hpo p’ma le:
“K’laz keiz li ah?”
 P’hpo p’ma k’tai hse pgaz le:
“Keiz li”.
             Cav se blau tai hse se blau. Wiz blau neif p’k’hiv htauf keiz hsau dauv taj pof lof keiz qauz soo dev pooz le s’kitej gauz htiv. P’hpo p’ma k’keiz paux p’hki praij.  P’cuceif t’paz p’k’hiv htauf tij qux hsau hki beif av hkauf dei, av nauj caj of s’kraiz dai. P’cuhswai t’paz hiv htauf nauf dokwax, kwav htauf hsau av hkof saf dauv p’k’htu k’hpaf taj div av lauj lauj.  Htu k’hpaf taj k’tej p’cav dauv p’hpo p’ma av taj le:
“K’laz leiz li ah?”.
Av wai seif k’civ hse k’dauv pgaz le:
“Keiz li.”
Cav se blau tai hse se blau div lauj lauj.  Wiz t’blau p’k’pov hsau hki beif neif av hkof le nauf dokwax beif htif beif htif, p’pov t’hsoof baf, t’tuz le av si baf, hsau av wai k’kauv “kav-auh”. Wiz t’blau p’wix si hsau hki beif neif dauv gaiz auf gaiz au auz.
Hpai taj hse k’tauj neif p’wai daf le av kai taj hpo taj liz seif t’hpaf t’dev dauv t’dev k’cav laux sav le:
“Eih! Hpatij hif hkof meij av kauv keiz k’laz wiz li ah? Wix si hsau li ah? Gaiz auf gaiz au wai li ah? Hpo muf hpo hkwa n’laiz kwaj kwaj mauh? Taj k’pauz mau krej lax li, tax baf le av taj wiz li ceij mauz nyeh!”
Tuz meij p’seif nya le p’hif hkof kauv keiz k’laz wiz li blau neif, p’k’cav htauf kauv keiz k’laz kauv dev t’blau qau prauv. Le neif t’dev kauv av k’laz, le neif t’dev kauv av k’laz, le neif t’dev kauv av k’laz. Qau tej hkof le iz le bav sai klauv klauv klav klav t’htoof nwiv dau hif nya.  Kauv k’laz wiz blau p’k’gaiz auf gaiz au keiz taj div hif hkof av sauv.
Tuz meij p’gaiz auf gaiz au wiz p’baf kij cu. Baf hsaf hif hkof k’baf kij hso wai le av hpo av liz av maix nya div sauv dauv taj kauv k’laz ceij. P’hif hkof baf blau blau kij auf av cu le htauv, av taj wiz nauj. Baf blau blau kij wai le hsau, av taj wiz hklei. Wiz nauj ah hklei ah p’baf hkauv auz.  P’kai moj kai paj hpaf moo p’gaiz auf gaiz au mei wiz p’k’civ p’hpo p’liz le:
“Hpomuf hpohkwa eh, n’laiz kwaj kwaj n’hpatij gaz neif, meij av gaiz auf gaiz au wiz li ah? Av kij lauz av cu wiz li ah? Pgaiz p’taj soo miz li, of div keiz k’hkuf lauz aih! Taj mof auf p’sav le meiz li aih!” 
P’hpo p’liz k’laiz kwaj wai dauv k’keiz tai baf pgaz le:
“Eh! Hpatij av taj soo miz li, hkwaiv lauz meiz li, kij lauz av cu li.”     
Tuz meij p’seif nya le hif hkof kij lauz av cu li neif, p’k’cav htauf kij lauz hswai keiz av hki.  Taj kij cu neif p’maz av gix av geij div iz: P’k’maz lauz meiz le meiz laf pooz, tez lauz taj soo t’laf pax lauz le meiz laf pooz, deif lauz siv t’beif pax lauz le meiz laf pooz, hiv neij keiz meiz toj hpix hkof 3 lof pax lauz le meiz laf pooz, hiv neij keiz meiz tauz 3 k’dauf aiv lauz pax lauz le meiz laf pooz, k’hti le p’saiv kwix av beif li pax lauz le meiz laf pooz, s’kwi le aiv kwix av beif li pax lauz le meiz laf pooz. Le av k’tej p’tai dauv kwaj p’hpo of yaij gaz, p’taj paux muf pgaj t’gaz dauv nauj k’caj t’gaz, hkailex nwi gaz. P’k’yiz neij luj 7 yiz, tauz lauz meiz laf hkof hpraiv hpraiv hpraiv 7 bo lex. T’blau nya neif p’k’kauv neij keiz p’hpo p’liz av k’laz t’blau dauv, dauv p’k’htu k’hpaf taj div av lauj lauj.
Htu k’hpaf taj wiz p’taj paux muj pgaj k’kij hso neij p’cu. Av wai k’hiv htauf neij luj t’yiz, htauv lauz wai le lauhkau siv av pooz, meiz av hkof, meiz toj pix av hkof, meiz tauz av hkof, k’hti av hkof, s’kwi av hkof, wiz dauv kij neij p’cu. Kij cu kweij kweij htuk’hpaf taj kweij kweij. Taj htuk’hpaf av saf neif div av lauj lauj.  Wiz t’blau neif p’k’kij k’dakeiz p’taj paux muf pgaj av cu, maz div sauv p’taj paux muf pgaj maz neij pgaz neif maiv. Kij taj paux muf pgaj av cu wiz kij neij k’dauv p’hpo waij ko, meimeij p’taj paux muf pgaj k’kij neij p’hpo noox cez le av tohkof t’gaz. Kij lauz div iz kweij kweij tuz av lex p’hpo av gaz.
Tuz meij kij cu wiz kauv gaz blau neif, p’k’hiv htauf siv le meiz laf pooz t’beif neif, guz htauf sav soo lauj miz hkof hif htoof htiv.  P’k’bauv t’hkij auz, hkwaiv lauz siv le hif htoof htiv le cune hkof t’caiv t’caiv dauv p’k’htu k’hpaf taj kweij kweij div iz:
“Sa k’caj, sa k’caj, hti k’caj kauj k’caj, moohkof k’caj hauf hkof k’caj, hauf hkof k’caj k’hpix k’caj, k’cej k’caj k’loz k’caj, htinaj k’caj htiklo k’caj, taj looj k’caj taj krauz k’caj, miz hkof k’caj pgaj pooz k’caj, moohkof nwi k’bliv hauf hkof nwi k’hte, kij htauf baf naz kauv htauf baf naz t’lex t’cau baf. Muj hsa t’niz nya iz y’kij lauz y’cu y’tez lauz y’hkauf le Nif sau hkof, hsaiv lauz nif hse le av sau hsaiv lauz la hse le av sau. Hai auf y’siv hkof hai auf y’meiz dav le deif lauz neij naz hkwaiv lauz neij naz. Auf auz au auz wiz de iv yaz kwaj yaz, kwaj de k’caj kwaj de hkinai, kwaj de hif kwaj de qau, kwaj de taj of kwaj de taj hso, kwaj de klai kwaj de pooz, kwaj de taj hpiv kwaj de taj maz, kwaj de hsgif kwaj de quv, kwaj de taj buf kwaj de taj bauv, kwaj de htauv kwaj de hsau, kwaj de p’naj kwaj de taj tau, kwaj de htof dif kwaj de hsauhpo.  Kwaj tuz av s’liz kwaj tuz av hsav klav, kwaj de muj naz kwaj de muj hsa, kwaj av hav miz hkof kwaj av hav pgaj pooz, kwaj av maz taj kwaj av auf taj, maz taj le hsgif maz taj le quv, seif dei lauz looj waf dei lauz taix, cu k’baf tej hkauf k’baf htiv, cu k’baf hsauv hkauf k’baf hsoo, seif hpoo k’blof waf hpoo k’riv, lej k’riv seif k’kaj qij.
             Tuz iz soonya hkaupaz heif le p’laiz baf taj mux keiz baf taj pez, laiz baf sif nemoo laiz baf hpau nemoo, pgeiz baf taj av baf hsa baf taj av ka. Tuz iz soonya hkaupaz neif p’k’hpaiv lauz hsgif p’k’hpaiv lauz quv. Maz k’liz baf maz sauf gauz geiz, maz bu geiz maz nauj leij, maz taj cooz baf maz taj yau sei, cooz le muj naz yau le muj hsa, hsaihtu auf baf yuj maz waiz auf baf meiz, su t’saf wi su t’auf bla, auf kuv auf pgaiz, auf geiz auf wa, of baf taj mux hso baf taj pez, of baf le taj av hkuf hso baf le taj av bav t’keij! … Sa k’caj, sa k’caj.”
P’htu k’hpaf taj k’tej p’siv k’of tauj div baf cune t’du, p’k’yoox neij p’taj paux muf pgaj. Av wai k’au baf dau wai t’caiv dauv yoox qauz neij av hpo waij ko, av hpo waij ko au dauv wai t’caiv yoox qauz neij av puj hki gaz t’gaz. P’au baf dau auz div iz tuz av lex av gaz.  P’hpo mei hsiv div t’sei au siv div baf p’k’blai lauz le av hkof hti t’caiv.  Of div t’caiv p’kai taj av moj gaz p’k’au lex keiz kwiv.  Wiz blau p’deif lauz le av sau t’beif, dauv p’k’au kwiv. Deif lauz le av sau, yoox neij p’hpo waij ko, p’hpo waij ko au dauv kwiv. Div iz kweij kweij tuz meij hkwaij av hkof kauv gaz. Siv neif mei maz hki ko p’k’pax keiz auz t’ko, mei maz t’ko p’k’baf pax keiz auz t’koox. P’au siv mei wiz blau li neif, p’auf s’kauv keiz meiz prauv lauz. Hsau qi le p’auf av nyaf lex li neif, p’t’nyokwix auz baf, p’hsgauv htauf neij keiz auz t’qif dif le laf lax.    
             Tuz meij auf meiz au hti wiz kauv dev blau neif, muj htauf hsgauf htauf nyau. P’k’of bgiv of sa p’sav, tai niz kauf kav taj de moj de paj de hpo de liz de puj de waij. Baf t’dev dev k’pgiz hkof looj hti av hpi av hpu av hkof of ceij.  Of bgiv of sa sav tuz le muj htoof muj qeij. Le muj qeij lauz p’k’tai laux sav le:
“Muj baf hkwaiv siv hki li, laiz…laiz soo hpatij hif hkof gaz neif av dev, laiz au s’kauv av siv hki dav.” 
 Meij le siv hki neif hif hkof k’baf hkwaiv wai le av hpo av liz av maix nya ceij.  P’kwaihtauf laux sav laiz soo hif hkof av dev praij.  Laiz tuz hif hkof k’hsau lauz siv le av pax keiz wai le m’gauz neif, hiv htauf deif lauz wai t’beif, qax qauz av sav soo hif htoof htiv, bauv t’hkij lauhkau siv, hkwaiv lauz siv le av cune hkof t’caiv t’caiv dauv htuk’hpaf de taj. Taj htuk’hpaf av saf neif, div sauv dauv p’deif lauz neij hti k’caj kauj k’caj av taj t’hkluv le p’auf meiz div baf neif lauz. Htuk’hpaf taj k’tej yoox qauz neij av ma, av nauj k’caj t’au wai baf. Av ma au wiz yoox neij av hpo av liz dauv pgaz hai hav of auz seif t’hpaf kauv gaz kauv gaz wiz au lex wai daf kwiv. Deif lauz k’dauv wai t’beif, av k’caj au wai dauv yoox neij pgaz kauv gaz kauv gaz wiz dauv au lex keiz wai kwiv.
             T’blau neif k’deif neij keiz av hpo av liz dauv pgaz k’yaij le av hai le av dev seif t’hpaf t’gaz baf t’gaz t’gaz baf t’gaz tuz hkwaij hkof kauv gaz.  P’au s’kauv siv prauv prauv div iz tuz meij of keiz le av k’tej t’beif, hif hkof k’hkwaiv keiz k’dauv wai, hkwaiv lauz siv le hif htoof htiv, htu k’hpaf taj. Htuk’hpaf taj wiz yoox neij av hpo t’gaz geiz t’gaz geiz. Av hpo t’gaz neif, k’yoox neij k’dauv pgaz kauv gaz dauv le av k’tej k’au lex wai daf kwiv. 
Siv le av k’tej t’beif lex blau, av hkau p’nyau le taj hkwaiv siv hki le hif hkof av dev wiz htauf wai k’cau dau. T’blau neif p’kwai htauf laux sav hav keiz le p’kai taj hpo taj liz seif t’hpaf av dev t’dev baf t’dev t’dev baf t’dev tuz hkwaij hif hkof. P’hif hkof k’baf hav dauv pgaz dauv k’baf hkwaiv neij av hpo av liz av siv hki div av lex av dev ceij kauv. Tuz meij hif hkof hkwaiv siv wiz dev kauv hplef neif, av hkau p’nyau le p’maz nif sau hkof wiz htauf wai k’cau dau lauz.
Hpai hav au s’kauv siv av hka neif, p’hpawa hta prauv prauv prauv, of de av dauv de av hpauf.  Hta neif maz sei kauv miz, hta hsau hif pgauj de, hta hif geij qau kav, hta miz hta pgaj, hta htoo hta Ywaz, hta nauj de cau, hta hsauf baf iv lauz, kwaj le hta neif maz sei kauv miz, maz t’sei baf t’miz htapluz neif lauz.  Baf hsaf a t’keij pgaz k’maz hta hif geij qau kav, hta miz hta pgaj le av baf qav dauv taj qoo taj hpauv, taj aif taj kwi laux sav, taj tocez maz cez laux sav, av do div sauv dauv:
Hti k’caj av cumeif htau    kauj k’caj av cumeif htau,
p’mei au siv p’raif lauz   p’mei auf meiz p’raif lauz,
lauz baf le av pluz hkof dau soonya p’maz nyau auf nyau.

Pgaz miz leplez maz div iz   pgaz pgaj leplez maz div iz,
miz me p’maz paux av hki pgaj me p’maz paux av hki,
p’mei t’maz taj div iz   lauz maj moj dauv paj av miz.

Pgaz miz cauhsgai miz cauhsgai  pgaz pgaj cauhsgai pgaj cauhsgai,
hif hsaihkof dauv too dauv kwaiz  hif hsai lax dauv too dauv kwaiz,
cauhsgai mei si teij av wai   teij cauhsgai av lauj t’pgaiz.

Dau puj waij sif laux cune  moohkof lauz pgauz hsauf htauf cez.
Dau puj waij hkwa p’mei qoo  bauv htauf s’kauv seif hplef htoo.
Puj le lax waij le htav eh  su t’maz sau t’maz e.
Dau puj waij hkwa t’a gaz  baf taj nav tolaux p’sav.
Teij p’hkof qoo p’hkauf qau  div pgaz kwaiv oov pgaz qau mau.
T’hkauf iz bau gaiz nav gaiz  geiz le p’htauv hkof roj mai.
T’hkauf iz muj riv bau riv   sof hpo sof liz sof qiv qiv.
Maiywai roj lauz av bo hsi  moj civ kwaj hswai laux p’hki.
Maz p’wai t’doof moj hpo  maz div k’nai pgauj av hpo.

Baf hsaf pgaz le av t’seif nya hta baf, hpawa wai t’sei baf hpaf moo k’tai s’kauv. Taj tai s’kauv neif baf qav wai daf dauv taj of hif hso qau, taj hsau hif hsau qau, taj kau taj hkai, taj qoo taj hpauv, taj k’maix hsaiv kaiv, taj suv taj klaiz, taj maz taj auf, taj hpaiv hsgif hpaiv quv, taj duf taj htoo. Tai kweij kweij au siv kweij kweij, tai kweij kweij au siv kweij kweij, tai neif miz wiz tai neif miz, tai neif miz wiz tai neif miz dauv. Laiz wai daf prauv prauv t’miz tuj t’miz tuj, moz maij laux sav kweij.
            Baf m’taz laif le p’wai seif Pgaz K’Nyau iz baf maz Nif sauhkof, kij laux cu, kauv keiz laux k’laz, au s’kauv siv auf s’kauv meiz le iz gaz av dev le neif gaz av dev, uf luj maz hta dauv tai niz kauf kav taj prauv prauv prauv div iz?  P’maz div iz neif meij le:
Av hkauf htiv t’htif meij wai daf :  Meij le p’wai daf iz p’of p’hso, p’maz taj auf taj le miz hkof pgaj kla, le seif cguj k’ne. P’maz daf wai auf daf wai, t’htauv sav le pgaz hki pgaz loz nau gaz baf. Maz sav div neif av qo, p’of wai daf dauv p’gix p’geij t’hsau baf t’hsau baf tij maiv moz maij laux sav looz t’nif klez. Div sauv dauv taj hpaiv hsgif hpaiv quv, taj maz muj auf waiz, taj luj auf taz muf taz qaf, taj luj hti luj kauj, taj luj hif luj qau, taj hsau hif pgauj de, taj maz dev maz lauj, taj maz klai maz pooz, of wai daf baf tij maiv k’wauz klauz lauz.
 Hki htif t’htif meij wai daf :  P’cooj nax le moohkof hauf hkof, seif dof waf pgaj, hsaf hpo kauj hpo, hti naj htiklo, k’liz sauf gauz le p’soo auf auz luj auf luj au p’taj of moo neif of dauv av k’caj. Maz sav div neif av qo, t’hkluv hpaiv lauz quv div baf, p’k’baf qei av hkwaiv le av k’caj laux cez. P’baf deif siv hkwaiv meiz dauv qei taj le av k’caj div sauv av k’heif pgaz av hkwaiv soo auf hauf hkof hauf div, htinaj htiklo, seif dof waf pgaj le p’k’maz auf muj maz auf waiz av gauj. Heif le bu geiz hu geiz dauv qei neij av taj hkauv kwaj maz cez pgaz looz t’nif klez neif lauz.
 Se htif t’htif meij wai daf :  T’hkluv le hpaiv quv le av sau t’nif div baf, le p’dev hkof lauj pooz t’dev dauv t’dev lof baf le duv hsoof htauf laux keiz sav.  P’taj duv hsoof htauf laux keiz sav iz hkauhplo le p’kauv neij keiz laux k’laz, kij neij laux cu dauv auf s’kauv meiz au s’kauv hti le av wif av hse.  Div sauv le p’gij p’ba k’of wai le le pgaiz pgaiz le nauj hko le nauj sav. K’maz taj maz le av of hkauv lauz p’klai le quv a a gauj gauj soo av maix nya paz le taj hkof hpgi hki hpgi dauv taj mux taj hkuf av hkof. 
           K’laz mei geiz, sav mei hsoof, pooz dauv taj hsoov taj hsa, maz taj le taj soof hpgi sav klau, taj hsek’tauj le kwaj hsgif kwaj quv of a, p’bu p’hu, p’taj dauv taj laf, p’taj soof taj hplav le quv k’geiz dauv p’k’neij auf baf av soof av saf le le pgaiz pgaiz.
 Lwij htif t’htif meij wai daf :   Le p’hif p’qau, p’taj of taj hso, nif le av pooz kwix, baf t’baf k’of dauv taj baf htiv baf do laux sav, taj soof htauf sav hei laux sav, sai laux k’wiz cauf laux k’laz, eif laux noo eif laux naj t’blau blau ceij.  Maz sav div neif av qo, taj hse k’tauj iz meij wai muj le k’baf klaiz mux klaiz hpauv laux keiz sav, plaj neij laux taj k’maf yaj hkau yaj hkau. Meij le tuz iz soonya paz, taj maz le hsgif le quv kauv miz daiv baf maz cez laux sav, muj laj hsef se laux sav,  p’geij pooz laux p’sav t’sei baf. Av qo neif, kauv gaz daiv kauv dev daiv baf of keiz dauv taj soof cau sav hsgi.  Taj soof htauf sav hei laux sav su t’of le p’pooz nau gaz nau miz t’geiz. Div sauv k’maz s’kauv taj dauv maz cez laux sav le taj soof miz sav mux av hkof neif lauz.

< ก่อนหน้า   ถัดไป >